حمزة زوبع يكتب: حوار مع الخليفة الجديد
- نعم، أنا الرئيس الذي رشح نفسه من أجلكم.
لا تحدثوني عن برنامجي فأنتم تعرفونه أكثر مني.
لقد قمت بالانقلاب من أجلكم، فلماذا تطالبونني اليوم ببرنامج عمل؟!
برنامجي هو الانقلاب، وبرنامجكم هو تشجيع الانقلاب.
آه تسألونني متى سأظهر بين الناس وأخالط عامة الشعب؟
ومنذ متى وأنا أخالطكم؟ لقد أمرتكم فأطعتموني؟ فهل كنا في جلسة عرب ساعتها؟ أم كنت على التلفاز تشاهدونني؟
- ولكن كما تعلم يا سيدي الرئيس المرشح، فإن للحملات الانتخابية طبيعتها، والناس تحب أن تصافح مرشحيها.
- هذا صحيح، ولكن كما قلتم فأنا رئيس بدون ترشيح، ولا داعي للمصافحة، تكفيني وتكفيكم الإشارة من بعيد.
هل نسيتم ما قلتموه من قبل: "انت بس تشاور أو تغمز واحنا رهن الإشارة وملك اليمين؟ هل نسيتم؟
- لا يا سيدنا، معاذ الله أن ننكر ما قلناه، بل تعرف أن الشعب المصري طيب وحنين ويحتاج لمسة حنان، وكمان يطمن لما يشوفك رأي العين.
- آه، دا طمع وجشع، خلصنا من حدوتة برنامج الرئيس، طلع لنا موال نشوف الرئيس، لا لا لم نتفق على هذا. أنا بتاع انقلابات مش بتاع مقابلات، وبعدين اللي عايزني يجيلي أنا ما بروحش لحد.
- يعني مفيش أمل إن الشعب يشوفك في المحافظات والقرى والنجوع ويعرف سيادتك عن قرب؟!
- هو فيه إيه؟! تعرفوني عن قرب ليه؟! ما أنا واضح زي الشمس أمامكم وكلكم عارفيني كويس، بلاش تلاكيك وروحوا على شغلكم.
- يا فندم احنا شغالين ليل ونهار والدنيا مش عايزة تضحك لنا؟
- طيب لما تشوفوني حتضحك لكم، انتم فاهمين غلط، أنا هاقلب حياتكم نكد وظلام، بلاش تشوفوني أحسن.
- ليه كده يا فندم، داحنا مأملين فيك خير، ولما الشيخ الهلالي قال إن حضرتك اترقيت وبقيت رسول انبسطنا قوي جدا جدا خالص.
- طيب مادام كده صلوا على النبي وبلاش تعارضوا الرسول أحسن تنزل عليكم اللعنة إلى يوم الديك.
- تقصد يوم الدين يا فندم.
- لا، أقصد يوم الديك، الدنيا تطورت ومصر حتبقى أد الدنيا، والأفكار القديمة دي لازم تتغير.
- يعني إيه يا فندم؟
- يعني بلاش نوم وكسل وإسراف والكلام الفاضي دا، البلد مديونة لشوشتها وانتم عايزين تشوفوني؟!! أنا عايز شغل، شغل يا بني آدم منك له، فاهمين يعني إيه شغل؟
- طبعا طبعا، شغل يعني شغل، بس يا سيدنا أنت تعلم وأكيد الوحي بينزل عليك ويبلغك أول بأول إن البلد فيها بطالة عالية، وإن الجيش العظيم بيشغل المجندين ويطلعوا عينيهم ليل نهار ببلاش، ودا بيعطل الشركات الخاصة ويخليها تقفل وتطرد العمال والمهندسين.
- اسمع يا بني آدم منك له، الجيش دا أعظم مؤسسة، وانتم لازم تفهموا إن ولادكم يحصل لهم الشرف لما يخدموا في الجيش ولو ببلاش.
- بس يا مولانا... احنا...
- بلا بس بلا حس، مش ناقص كلام كتير.
- يعني يا سيدنا لا فيه برنامج ولا هنشوف فضيلتك ولا حاجة خالص؟!
- كفاية عليكم الأيام اللي فاتت، وكفاية إنكم زنيتوا على وداني عشان أشيل مرسي وأقتل الاخوان وأسجن الباقي، عايزيني أعمل إيه تاني؟!! وبعدين ما الأخبار بتجيلكم أول بأول من الحملة، والصور مالية الدنيا.
- طيب ممكن نقدر نزور حضرتك عشان نبايعك إماما للمسلمين أو خليفة أو أميرا للمؤمنين؟
- الكلام دا قبل الوحي، دلوقتي أنا رسول معتمد من الأزهر، وكمان يومين يطلع بيان بإعلان البيعة العامة وتقدروا تبايعوا بأنفسكم أو بتوكيلات للي ميقدرش يبابع بنفسه.
- ألف مبروك البيعة يا فندم، واحنا مبسوطين والحمد لله بعد ما ذكرتنا بموضوع الوحي دا، احنا اطمنا جدا خالص، وطبعا بنطلب من حضرتك تسامحنا على تطاولنا وطلبنا رؤية إمام المسلمين.
- على فكرة انتم شكلكم واخدين الموضوع بتاع الوحي دا هزار، وأنا حاكلم شيخ الأزهر عشان يطلع فتوى بمنع الهزار في المسائل الحساسة دي؛ لأنها أمور مرتبطة بالعقيدة.
- لا يا فندم مفيش داعي، الشيخ نادر والشيخ برهامي - عارفهم طبعا يا سيدنا - قاموا بالواجب ونبهونا في المساجد وفي البرامج على الموضوع ده، وحذرونا من مغبة الخروج على الإمام والخليفة والمشير والرئيس.
- آه، طيب كويس إنهم عملوا كده؛ لأن الموضوع دا مهم جدا جدا، والناس لازم تعرف حدودها فين عشان ما تقعش في الشرك والعياذ بالله.
- أستغفر الله واستغفر لنا يا رسول الله، احنا كنا جهلة والحمد لله اتنورنا رغم أن الكهربا قاطعة.
- انت بتسخر مني يا بني آدم انت وهو؟!!
- أبدا والله يا حبيب الله.. أسخر؟؟ دا أنا ينقطع لساني، أنا حبيت أعمل دعابة خفيفة، هو حرام الواحد يعمل دعابة حلال مع الرسول والإمام؟!
- لأ مش حرام يا روح أمك، دي كبيرة ممكن تروح فيها في داهية دنيا وآخرة.
- يبدو إني أنا غلطت، العفو والسماح يا سيد الرجال.
- سامحتك، عايز حاجة تانية؟
- أشكرك على وقتك رغم مشغولياتك الكثير، ربنا يكون في عونك، حتعمل إيه وللا إيه! حتبقى نبي وللا رسول وللا خليفة وللا رئيس! أنا رأيي إن حضرتك تتفرغ للرسالة، دا الوحي تقيل عليك. ربنا معاك وياخد بإيديك وينصرك على الإخوان.
- دي أول وآخر مرة تطلب تتكلم معايا تاني وجها لوجه، أنا سمحت لك المرة دي بس، المرة الجاية لازم تستأذن وتقدم طلب للطيب ويوافق عليه مجلس الوزراء ويكون من وراء حجاب. أنا مش فاضي، فاهم؟؟ مع السلامة، المقابلة انتهت.
المصدر
- مقال:حمزة زوبع يكتب: حوار مع الخليفة الجديد موقع: إخوان الدقهلية
